Friday, May 18, 2018

ඔවුහු

ඔවුහු;
රතු පාට මහා පොළොව
දළුලන්න ඉඩදෙන්න
ලේ සුවඳ මද සුළඟෙ
මල් සුවඳ පැතිරෙන්න
ගිනි දැවෙන දහස් සිත්
කෙසේ හෝ සනසන්න
ගලා යන කඳුළු ගඟ
හරස් කොට නවතන්න,
නික්ම ගොස් ජීවිතෙන්
අපේ දිවි සරසන්න...

Tuesday, February 6, 2018

සසල නිසල

 

                                                                        නිසල සඳ නුඹ 
                                                                        සසල කළ මගෙ හද
                                                                        නිසල වී අද 
                                                                        සසල කර මගෙ හද

Thursday, December 22, 2016

හිම බිමේ සැඟවූ තැන

හිරුත් උණුසුම් මදියි
උණුසුම් කරන්නට මිදුණු හද
නමුත් එක් තරුවක් ඇවිත්
උණුසුම් කරන්නට දරන තැත
කියම් නොකියම් ද තරුවට
හිම බිමේ සැඟවූ තැන?
යාවිදෝ අතැර ගිනි දැවෙන කතරක?
මඟ ළකුණු මැකී ඇත
හැමූ හිම සුළං මැද
කෙසේ නම් කියම් තරුවට?
මිදුණු හද සුරැකියි
හිම බිමේ සැඟවූ තැන

Friday, June 24, 2016

මගේ ස්ත්‍රීත්වයේ උභතෝකෝටිකය

පරීක්ෂණය: කොණ්ඩය හා මම
දත්ත
වස්තුව: කොණ්ඩය
අයිතිය: මට
ස්ථානය: මගේ හිස මත පිහිටා ඇත.
අනෙකුත්: කොණ්ඩය නඩත්තු කිරීම මා විසින් කරනු ලැබේ.
                ජීව විද්‍යාත්මකව උපතේ සිට මා ස්ත්‍රී ලිංගිකයි.
කාල සීමාව: වසර 01 මාස 05
ප්‍රශ්නය: ඇයි කොන්ඩේ කැපුවේ?
පිළිතුර: පහසුවට

ප්‍රතිචාරය 01: ඒ උනාට ගෑනු ළමයෙක්ට කොන්ඩේ තියෙන්න ඕනේ.
ප්‍රතිචාරය 02: ගෑනු ළමයෙක්ගේ ලස්සන තියෙන්නේ කොන්ඩේ.
ප්‍රතිචාරය 03: කෙල්ලෙක් උනාම දිග කොණ්ඩයක් තියෙන්න ඕනේ.
ප්‍රතිචාරය 04: සාරියට ලස්සන දිග කොණ්ඩය.

විශේෂ අවස්ථා:
"කෝ උඹේ කොන්ඩේ"
"ඒක කැපුවා"
"අඃ...ඒක නෙවේ අපි කොහෙද කන්න යන්නේ?"

නිගමනය
මගේ ස්ත්‍රීත්වය තීරණය කරන ප්‍රධාන සාධකයක් වන්නේ කොණ්ඩය හා එහි දිගයි.

සාකච්ඡාව
කොණ්ඩය කපා වසර එකහමාරකට ආසන්න කාලයක් ගත වීද ලැබෙන බහුතර ප්‍රතිචාර මත මගේ කොට කොණ්ඩය මගේ ස්ත්‍රීත්වය පිළිබඳ ගැටළුවක් මතු කරයි. මෙය වෙනස් වෙන අවස්ථාද ඇත. ඉහතින් දක්වා ඇති විශේෂ අවස්ථාව එවැන්නකි. එබැවින්, පිළිගත් ජීව විද්‍යාත්මක කරුණු වලට හා උපන් මොහොතේ සටහන්කල මගේ උප්පැන්න සහතිකය අනුව මා ස්ත්‍රී ලිංගික වුවද සමාජයමය කරුණු මත එය ප්‍රශ්නයට ලක්කෙරේ.

Friday, April 22, 2016

බක් මහා උළෙල

මතකද....
එදා බක් මහා උළෙල?
කතා නොකළේ එතරම්
ආඩම්බරේට නෙවෙයි

අවුරුද්දක්ම ගියා
පසුතැවි තැවී
එදා කතා නොකලට

මෙදා පාරත් එනවද?
කතා නොකරාවි එතරම්
ඒත් ආසයි දකින්නට අයෙත්...

Tuesday, December 15, 2015

කොන්ක්‍රීට්...

අනුපාතෙට සිමෙන්ති, වැලි එකතුකරලා
අච්චුවට දාලා හදපු
කොන්ක්‍රීට් කණු අතරේ
ඉස්සර දවසක
වචනයක්වත් නැතුව
කුළුගෙඩියකින් ගහලා
කුඩුකරලා දාපු,
මිටියකින් ගල්කටුවට
යාන්තමට තට්ටුකරලා
හැඩකරලා
සියුම්වට දාර තියලා
මවපු කැටයම
අඳුරගන්න පුලුවන්ද  මන්දා....

Tuesday, September 1, 2015

හිමි - අහිමි ප්‍රේමය

පෙම් කලෙමි නුඹට
ඇය සිටින බව නොදැන
පෙම් කලෙමි නුඹට
නුඹ ඇගේ බව නොදැන
පෙම් කලෙමි නුඹට
නුඹ අහිමි බව නොදැන

පෙම් කරමි නුඹට
ඇය සිටින බව දැන
පෙම් කරමි නුඹට
නුඹ ඇගේ බව දැන
පෙම් කරමි නුඹට
නුඹ අහිමි බව දැන